<![CDATA[Mon Petit de Paradis... - Home]]>Sat, 21 Nov 2015 07:18:53 -0800Weebly<![CDATA[Ka 'One Night Stand' ve kha.!!!]]>Tue, 30 Apr 2013 23:43:47 GMThttp://fellington.weebly.com/home/ka-one-night-stand-ve-kha 

Ocotber thla a ni a, favang hun nuam tak mai chuan min chenchilh mek a. Khawthlang lama ni eng mawi tak herliam mek thlir dauh dauh paha kan kawt lamkhuang buk hnuaia ka thut lai chuan ka hnunglam atangin ka thianpa Ramdina chuan “Heyy, Lulianpa(min koh dan) zanah Pukpui-ah kal ang. Full moon lawm an tam viau ang.  A nuam ngawt ang” ring leng lawngin tu mit mei mah veng lem lo chuan a rawn ti leng leng mai a. A rawn phei vuta, ka thutna bula thutna awlah chuan a rawn thu vei thurh a. Kei lah pek, englai pawha inring reng mai chuan “Pawi hleinem, kal ila ni mai lawm i peihte chuan” tiin rang fein kan chhang ve nghal mai a. “A tla hlang pawh an awm ang, i lawm chi” a’n ti leh ngawt pek a. “A tla hlang an awm chuan ka kian nghal che, chutiang ka duh mai mai lo” tiin ka chhang a, “an awm chuan pawi ka ti hleinem” an ti ve nghal rawk a. Kan inhre chiang bawk a, rilru tak tak hian kan inkawm thei meuh lo.

 

Kan thian dun hian kan hawkdak vang pawh ni bik em em chuang lovin lenkual mai mai nuam timi kan lo ni ve ve bawk a. Zan rei tak tak thleng kan lenga, nula rim chuang hlei lovin Pukpui khaw luh dawna centenary lung phunna hmun zawl nuam deuh maiah hian zan rei tak tak thleng kan thu a, kan titi a, naupan lai chanchinte kan sawi leh chiam thin. Kan haw a, kan inah kan luta, thingpui kan lum a, TV en pahin kan titi leh te te a, chumi zawhah an inah kan chhuk leha, games kan khel leh ringawt thin. Kan zantin hun hmandan hi nula rim aia nuam kan tih zawk vang a ni bik hauh lo a, rim turte chu neiin hmu ni ila chuan tlangval pahnih titi tura khaw dai lam pan reng thu awm suh. Nula mi ka ni lo a, nula mi a ni bik hek lo ti ila dawt tlem chu ka sawi tel hlek mai thei. Kohhran sadai thiat zawngin kan khawsa ngai lo a, kan chhungte paw’n kan awmdan an hre chianga, min ngaihtuah lutuk ngai lem lo. 

Zanriah eikhamah chuan ka insiam nghal sawk sawka, ka pheikhawk ka bun dawn lai tak chuan Ramdina chu inla nalh fe hian a rawn lut a, tunge awm ve dang pawh pawisa lem lovin “Lulian, mawza uih bun suh aw, pheikhawk phelh te pawh i ngai thut mai thei a nia” an rawn ti lut nghal thawr ringawt a. Ka nu a awm ve avangin ka melh rum kher mai. An motor a rawn kenga, midang sawm kual tur kan nei lo bawka, Pa Mawitea dawrah a damdawi(Zarda.!!) leh eitur eng eng emaw kan lei kual hnu chuan  “Ayo Technology” play thum dup dup pahin Pukpui lam chu kan panding ta nghal vang vang a.  Kan thlen phei hma Zotlang Sipai camp bul atanga kan han thlir phei chu motor hi Pukpui lam panin a inzui phei diah diah a, thla eng bawk nen a hmuhnawm kher mai. Rei lote hnuah chuan kan thleng phei ve a, kan rin aiin mi an lo tam daih a, nula phei chu chhing tak tak, a then tight tak tak pawh an tei thulh thulh mai. Chhung lam a tight em ? tih erawh chu keini tan hriat phak rual a ni lo !!. Nula hruai tur nei ve lo ta ngang chu kan thian dun chuan kilkhatah chuan kan thu ve ran a, kan hla ngaihthlak pah chuan kan eitur kente chu kan kheuh ve neuh neuh a. Ramdina pek chu a che hit hmasa zawk nge che hit lo zawk pawh ka hre lo, chutia kan thu fel deuh chiah tihah chuan a hmelhriat thenkhatte chuan an rawn au lauh lauh mai a. Ani lah phur fahran maiin “Lo awm rawh aw” tih leh tlanphei nghal a rual a. Khatih laia ka mal zia kha MALTA ka ni ringawt. !

 

Zep thu a cheng lo, hetiang hunah hi chuan mit hi thunun a lo har leh fo thin. Ka hmaa tleirawl tituai nalh tak mai, Amah kawmthlangpa Rina tawngkam takin, kham chhawrdawh kara Saisu bul ang tuih maia ding paw pheu mai chu ka lo thlir reng a. A bawpte lah chu a’n vawng tha mai mai khawp a, thing chu nise Banril atana eh tham lawih tur mai hi a ni.!! Suangtuahna ramah chuan Bahra kan lai dun lo chiang kher asin.! A hmel ngun taka ka en reng lai chuan amahah chuan engemaw kamtu awm tlat ang mai hian a thaw leh deuh halh thin a. Hlim taka lam chu tum ve thin teh mah se a hmelah chuan hlimna famkim a lang chhuak tlat lo. Chutia chik tak leh mit tla lo leka ka thlir reng lai chuan ka lam a rawn hawi phei a, min rawn melh chiah mai chu ka lai chhe der mai. Rang takin ka mit ka la sawn vat a, ka zahzel chuan ka bula Lays bawm chu ka kheuh hawng ta nuah nuah a. Ka beisei loh leh ka ngaihtuah phak miah loh chuan ka lam pana rawn phei pahin “I va mal ve a, khawnge i chhas” tih pah chuan ka bula a a thut theih leh theih loh chu min rawn zawt a. Ka nui a, “Aaa...thu thei teh reng mai..ihhh hei ka thianpa nen Foon moon, ohh Full Moon han lawm ve ang kan tia, kan rawn kal ve mai mai a nih hi, i lam nasa sia i chau tawh ngawt lo maw” tia tawng sual nawk nawk pah chuan ka Lays  ei lai chu a lamah chuan ka’n dah phei a.

 

“Chu in rawn Foon moon ve dawn a ni maw, chau khawp paw’n ka la lam lo, ka cousin te’n kal ve ang u an ti tlat a ka kalpui ve mai mai” tiin ka tawng sual zeuh hmang chuan mi rawn chhaih pah a, mi ti confi lo zovin mi ti lai chhe deuh der mai a.

 

“I sual lutuk, mi tawng sual ve te. I lam thiam khawp mai, i lam thang viau a niang maw” ka’n ti ve leh thawr a. Nui seih pah chuan “A awihawm loh em mai, ka lam ngai lo. An phur hlawm sia lampui loh theih pawh an ni lo” a rawn tih rual chuan keimaha awm ka ze ngai, ka duh loh em em mai chu a rawn chhuak leh tlat pek a, sawizawm tur ka van kher mai. Ngawi dun deuh reng chuan Lays chu kan ei dun deuh malh malh a. Ka rilruah chuan a rawn lang thut a, inla zei tak maiin “Marema ka nia, engtinnge ka koh ve ang che” tiin kan zawt phawng mai a. A ni lah chuan zangkhai tak maiin “Min zawt har ka ti reng a(h), Maria-i ka nia, Venglai..Khawi vengah nge in awm” tiin min zawt zawm zat a. A tawngkam atang chuan nula zei ve thawkhat chu a niang maw, a zangkhai em mai tih chu ka rilru chuan a ngaihtuah neuh neuh a. Chanmari-a awm ka nih thute, Gov’t College-a 2nd Year B.Sc ka zir ve mek thute chu ka hrilh chho ta a. Ani pawh chuan JB College-a lut a nih thute leh 1st Year B.A  a nih thute chu a sawi ve a. Kan inkawm chho zela, kan titi tui dawn chauh tihah chuan ka vanneih a siamin nge kan thutna zawnah tak chuan Car pakhat hi a rawn ding bu lawih a, a chhunga nula leh tlangval chuangte chu rawn chhuk sang sangin, kan awmve a ni tih ngaihtuah miah loin an hla play lai Chamillionaire hlaah chuan an rawn lam su ta nghawng nghawng mai a.

 

Chutak chu remchangah kei chuan lo la vatin “Pawi i tih loh chuan saw lai deuhah sawn insawn ang hmiang, an rawn bei hot em mai” tih pah chuan ka tho a. A lama ka kut thlak thla pah chuan mi rawn nuih sen sen a, “A pawi hleinem” tih leh ka kut chu rawn ban a ruala, kan piah tlang pawng lamah chuan kan inzui phei ta hnak hnak a. A piah thim tham lai deuhah chuan a kawp te te hian an lo thu far a, han thut ve maina tur kan van bawk si chu kan tei ruai ringawt a. Nakin deuhah chuan amah zawk chuan “Hetah hian thu mai ang hmiang, kal thui lutuk chu ka cousin-te ho an ngaih a lo tha lo ve leh ringawt ang” a rawn ti a, thuthmun chu kan remfel ve leh ta a.

 

Chutia thut hmun kan rem fel ta maw tihah chuan amah chu rawn tawng hmasain “Chanmari-ah tiraw in awm kha” a rawn ti a. Kei chuan rang takin “Aw ni e, a nuam a nia kan veng hi. Thiante i nei nghe nghe lo maw” tiin tawng tur ka haihchham lutukna lamah chuan kan ti zawm zat a. “Tluangtea kha i hre thin em, Pres biak in bul deuhah khan an awm” a rawn ti a.

“Tluangtea, Pres Biak In bula mi ka hriat chu August thla khan a thi tawh sia, midang hriat...”

“Aw khami Tluangtea kha, Lalnuntluanga, Bike accident-a thi kha” tiin ka tawnglai chu mi rawn pawt chat a.

“Hre lutuk e, kan tetlai chuan kan inkawm ve thin a lawm. Engtinnge i hriat a. Ka ui tak tak a ni Tluangtea kha chu, a nungchang a tha si, ruihtheih thil chu sawi loh meizial takngial pawh a zu lo a nia. A vanduai ngawt mai” tih pah chuan ka va melh phei a. Harsa ti takin a nui lui hram hram tih chu a hmelah chuan hai rual a ni lo.

“Ka thianpa a nia, i hrethiam ang tiraw ka thianpa ka tih hian. Amak ngawt mai tiraw Pathian rorel dan hi” a rawn ti chhuak phawng mai a. Sawi tur ka haihchham tak zet, a mittui chu ka hmuh hlau tak chuan a hru zauha.  “A nih chu ava zia lo ve aw, Pathian rorel dan hi chu a mak ngawt mai tiraw, kan hma hun minute khat pawh hre lawk loin thlamuang takin kan nung ve mawp mai a. Pathian hi a hmai zahawm thin ngawt mai. Mahse Tluangtea kha chu mi piangthar tha tak a nia, tunah chuan kan awmdan hi min awt lo ang. Ani chu Pathian bulah hlim takin a awm tawh a lawm le” tiin ka theihtawp chuan hnem ve ka’n tum a. Ni e, khawvela ka thiantha ber chan tawh ka nih avangin a tawrhna chu ka hrethiam tak zet a ni. Ka thianpa thih hnu, tun thleng mai hian a chanchin hi sawi nuam ka ti em em a. A chanchin sawi tura min titi pui peih an awm phawt hi chuan englai paw’n ka inpeih reng thin a ni.

 

“Zawh awm che a ni em ka hre lo a, ka tisual a nih chuan min ngaidam la. In chanchin tlem a zawng tal min lo hrilh ve la” tiin a rawn tawng ve leh hma chuan inthlahrung takin ka zawt a. Za lo takin a nui sen sen a, min chhang lo. A hmel ka en leh a, engtik laiin nge amah khawngaihna chuan ka thinlung a rawn luh tih reng ka hre lo.

 

"Ka tihpalh a ni, zawh miah loh tur  ka zawt che a, i rilru ti hrehawmtu nih ka tum miah lo a nia.”  Ka lo zawt kher kher chu ka inthiam lo khawp mai. Kan bul vela midang thawm chu ringin ri chel chul mah se chu zan chu a reh tlawk tlawka. Kan inkawm tantirha ka rilru leh tuna ka rilru chu inpersan tawh tak a ni. Sawi tur ka van tawh tak zet zet a, enge ka sawi leh ang aw tia thildang sawipui tur ka ngaihtuah lai chuan a rawn tawng chhuak leh a.

 
\
"Marem, tihsual i nei hleinem. Midang bula inbun ruah hawk hawk hi ka chak thei lutuk. Thian ka kawm tlem lutuk a, ka thian neih ve chhun lahte hi hmundangah lehkha zirin an awm vek hlawm bawk si a, i ngaihthlak peih dawn phawt chuan ka hrilh peih lutuk che a lawm. Mahse i ning zawk maithei a ni”

 

“Ka ning miah lo ang, ka ngaithla chak lutuk a lawm” tiin phur tak maiin ka lo chhang let vat a.

 

“Umm, nih ka’n sawi ang e, lo ngaithla char char rawh aw. Amah hi BHSS-a kan luh lai hian 12 an nia, keini 11, keini aiin kum khatin a senior a nih chu. Amah hi ka hre ngai em em lo a, mahse kan thiannu pakhat hian Pa a tihzia thu hi chu a sawi a sawi thin a, ka ngaihsak em em lo. Nikhat chu kan school bang hi Serkawn Hospital kawtah hian Ice Cream ka lei a, ka thiante chuan thlang lamah Rickshaw chang pahin min lo nghak a. Chutia Ice Cream ka lei ka thiante Rickshaw channa hmuna hmanhmawh taka ka chhuk thla tur chuan kawng ka lo en chiang lo a niang, kan School lam atanga bike rawn tlan chho chuan min rawn tai thlu tawp mai a. Min rawn en thup ka zak lutuk chuan ka nat leh nat loh pawh ngaihtuah loin ka tho leh nghal vut a. Ka’n in enchiang chu ka khup hi a lo thi sung mai a. Bike khalhtu chu ka lam panin a rawn tlanphei nghala, hlauthawng aw tih hriat tak maiin ka nat leh nat loh chu min rawn zawt chul a. A hmel kan en chian chuan Tluangtea hi a lo nia. Damdawi in a hnai bawka Damdawi Ina min kalpui an tum pawh chuan ka zak tawh bawk si chuan ka duh tlat lo a, “engmah a ni lo ka na lo. A zahthlak haw thuai thuai zawk ang u” ka ti tlat a. Chutia ka tih tlat avang chuan Tluangtea chuan a thiante rickshaw hmuh sa chu min kian mai turin ava dil a, an ni pawh chuan an lo rem ti ve mai a. Kan haw ta nghal a.”

 

“A tukah chuan nidang ang bawkin School chu kan kal leh a, keipawh ka khup pilh ve deuh bak chu na dang pawh ka nei chuang lo. Lunch Break kan neih lai chuan Tluangtea chu kan class-ah a rawn lang hlawl mai a, Kan bula thutna awmah chuan rawn thuin nimina thil thleng pawi a tihzia thu leh hrehawm a tihzia te, a hamhaih vek avanga ngaihdam pawh dil tha hman loa kan kal maite pawi a tihzia thu rawn sawiin ngaihdam mi rawn dil mawlh mawlh a, thupha chawi nan leh damdawi lei ngaite a awm takah tiin Cheng 200 min rawn pek a tum a nih chu. Chutiang engmah a ngaih loh thu leh na ka neih loh thute, kawng ka en loh avanga ka thiam loh a nih zawk thute leh ngaihdam dilna tur a awm loh thute chu ka thiam ang tawk chuan ka sawi ve a. Mahse a ni chuan ‘ka rilru dam nan tal canteen-ah lunch ka lo treat ang che u’ a ti tlat si a, han hnial vak ka hreh ve tawh bawk si avangin ka thiannu nen chuan hreh chung chungin kan zui chhuak ta a ni.”

 

Ngaihnawm ti takin ka biang dawm vauh vauh pah chuan ka lo ngaithla a, mi rawn nam zauh pah chua “Heih, i muthlu a law” mi rawn ti a. “Muthlu nang aw, Tluangtea chu khatiang mi kha a ni tlat a lawm, kan tet lai paw’n vawikhat kan insual a, a hnuah amah zawk a inthiam lo lutuk hi zanah a nu nen kan inah an lo leng a, amah ngeiin ngaihdam min rawn dil tawh a lawm. Khami tuma ka zah zia leh Tluangtea ka ngaihsan zia kha chu.”  tiin ka lo sawi zawm ve a. “Sawi leh tawh rawh inla in ngaizawng lo a nia” tiin nui pah chuan sawi zawm leh turin ka’n phut a. Phur tak mai chuan a sawi zawm leh bawrh bawrh a.

 

“Khami ni atang kha chuan Break a nih tawh phawt hi chuan kan block lamah a rawn phei ziah a, a nungchang khan min hneh em avangin rei lo teah ka nel ve ta nghal em em a, kan hriat loh karah kan inngaizawng chho a ni deuh tawp mai. Kan inngaihzawn tanna bul ber chu kha accident vang kha a ni a, kan tawpna pawh Accident vang bawk a ni leh kher hi hriatthiam har ka ti a, a mak ka ti em em thin. Vawikhat chu maw, class 12 an chhuah hnu khan Aizawlah Coaching Class kal kha a ngai ngei ngei bawk sia. Khatih lai khan tunlai ang em emin Mobile phone hi kan la uar lem lo a, keipawn ka la nei lo a, ani kha chuan Aizawl a phei hnu kha chuan a nei ve a. Zanah ka nu phone ka kawl sak thin a, zantin chu kan inbe ziah thin. Zan khat chu kan in text mial mial a, kan in text kar lakahte chuan mi rawn call leh zauh thin a. Nakin deuhah chuan ‘In kawtah khan chhuak lawk teh’ tih hi mi rawn thawn a. ‘Ngatan maw, a vawt si a ka peih lo’ tiin ka reply ve mai a. Mahse chhuak tura ngen taktea mi rawn ngen takah chuan chhuak tur chuan ka tho ta a. Kan kawngka pui ka hawng chiah mai chu kan verandah tawp chinah chuan nui sun sun pah hian a lo ding reng mai a, teddy bear lian lutuk lo hi a lo keng bawk a. Ka phu nasa lutuk leh a ngaihna ka hre lo lutuk chuan ‘Nangmah i ni em’ kan ti ringawt a. A rawn phei a, ‘rawn surprise che ka chak a, ka rawn phei tih ka hrilh duh lo che nih kha. Niminah ka pate an lo phei a, ka ngai tawh lutuk che a, an ruala haw ve zawk ka dil a, a lo phal ve mai bawk sia, kan rawn thleng chiaha ka rawn chhuk nghal nih hi’ tih pah chuan a nui vur vur a. Ka lawm bawk si, hlim bawk si chu awmngaihna ka hre lo chiang a sin.”

 

“Mi tihhlim dan hi a thiam em em a, ka lawm zawng leh ka huat zawng a hre em em a. Amah thinrim awm taka awm chung si hian ka huat turte hian mi chhaih thinrim hi a tum char char a, ka thinrim deuha a hriat hnuah hian mi tihlawm a tum leh ngar ngar thin. Sawisel tur ka hre ngai lo a, ka mipa duhzawng chu amahah khan a kim ka ti ve thin. Pathian hi dem chang ka ngah ve a sin” tia a sawi lai chuan a a mittui chu a hru zeuh zeuh reng a.

 

“A accident zan pawh kha a rawn leng haw lam a ni nghe nghe a. Inkhawm banah a rawn leng a, ka nute mitthi rala ka pa nen an chhuah daih avangin ka u nen chiah kan awm a. Thingpui kan in hnu rei lo teah chuan haw mai a duh thu a sawi a. ‘A la hma lutuk, dar 9:30 pawh a la ri lo, ka nute lo haw hma chu awm ve rih rawh, u mami nen chauh kan awm hi’ tia ka chelh pawh chuan engemawni mawlh tlattu awm ang mai khan a phi cheng a, a thu hle hle thei lo. ‘Ka haw zawk phawt mai ang, naktuk zanah rei tawk ka leng tawh dawn a lawm, ka thlen hunah lo text ang che, min lo thlah rawh’ tiin ngaihthat lohna engmah nei loin kan verandah thleng chuan ka thlah a, a tlan liam thleng chuan ka thlir zui a. Minute 10 a rala, minute 20 a ral leh a, a thlen vela min rawn text intiam si kha a ni em em tawh lo tiin message ka type lai tak chuan a number atang ngei chuan phone call ka dawng ta a. Ka pick up chiah chu hello pawh ti lo chuan ‘I va rei em em ve, hmundanga lenkual i duh vang a ni maw haw i lo chak em em’ tih pah chuan ka hau nghal bawrh bawrh a. A reh deuh vang vang a, insut ri feih feih ri ka hria a chutah hmeichhe aw hian “Maria, Tluangtea a chesual a, tunah damdawi inah kan awm mek, rawn hrilh che hi ka hreh lutuk, mahse hrilh ngei ngei  che hi ka tihtur a ni bawk si. A theih hram chuan tunah lo chho ve nghal ta che u” tiin a U Marami chuan Tluangtea phone atang ngei mai chuan min rawn hrilh a nih chu. Ka buai zo vek a, a chetsual dan pawh ka zawt thei lo, phone ka dah a, hmai hupin ka tap nghal char char a. U Mami chu hrilhhai zet hian a rawn tlan phei a, ‘Mate enge ni ta, ngatinge’ tia mangang aw taka mi rawn zawt pah chuan mi rawn kuah chawt a. ‘Tluangtea a accident, damdawi inah a awm, min kalpui rawh’ tah aw tuau chuan ka tia. Ka nu te chu a phone nghal a, keini pawh insiam sawk sawkin Damdawi in lam pan chuan kan tlan chhuak ve nghal a.”

 

“Damdawi in kan thleng chu maw, ICU ah an lo dah lut fel chiah hi a lo nia. A nuin min hmu chiah mai chu a a tap hawm hawm mai a, engmah hre loa ICU-a Tluangtea mu bam mai ka hmuh chuan maw ka insum thei lo, ka tap chhuak a, a nu nen chuan kan inkuah a. Khati ringawt kha chu hrilh a hai a sin. ‘Nu Rin, engtinnge a chetsual, a thi lo ang tiraw, a dam chhuak leh dawn tiraw’ tia mangang taka a nu ka zawh lai chuan min chhang thei bik a awm lo. Min kuah ngawih ngawiha, ka na vawng vawng mai a ni.” Ka khawngaih lutuk chuan sawi tur reng ka hre lo, amah chu kuah ve vawng vawng mai tak chu ka nap a, chu erawh thil mawi a ni hauh si lo.

 

“Marem, kan in atanga a haw tur kha lo la chelh lui hram hram ila, minute 10 tal chuan lo la chelh ni ila chuan a insut pui motor nen pawh khan an intawk hman miah lo tur a nia. Ka lo chelh lui hram hram lo kha ka inthiam thei thlawt lo a ni, tun thleng pawh hian. Khati taka haw hma a chak khan lo hrethiam ni ila chu, hetiang thil hi Tluangtea chungah a thleng bik lo tur, chu chuan a ni ka rilru ti na zual em em tu chu” tia a sawi melh melh lai chuan “I thiam loh a awm reng reng lo, ani chu Pathianin a bula awm turin a duh zawk a, a kal hmasa mai zawk a ni. Nakinah hlim takin kan la inhmu khawm leh vek dawn a lawm” tiin ka thiam ang tawk chuan ka’n hnem ve a.. “Chutiang a ni ngawt bik lo a sin, i hrethiam lo a nih kha. Nakinah kan la inhmu khawm leh dawn tih ringawt hian tuna amah ka mamawhna leh ka ngaihna hi min hnem zo lo. Kan in hmangaihnain a tawn san ber laiin ka hnena ta Pathianin min lak sak a, lungawi hi a har a sin. A thih hlim phei kha chuan Pathian hi ka haw tak zet a, ka dem a, ka inkhawm duh lo a, ka tawngtai ngai bawk lo. Mi inngaizawngte hlim taka an awm ka hmuhte hian ka thik rum rum thin a, Pathian ka demna hi a zual sauh thin” tiin a rawn sawi zawm a.




 Ni e, ka hrethiam lutuk tlat a tawrhna hi, mahse ka tawngkam thiam zawng zawng hi a amah hnemna tur khawpin a lo tlem lua a ni. A tana tih theih engemaw tak neih ka va chak tak em. Sawi leh tur ngaihtuaha ngawi renga kan thut lai chuan Ramdina lo phei lauh lauh chu ka hmu a, min rawn zawng a ni tih ka hriat chuan ka lo ko vat a. A rawn thu phei ve a, “Kha in va lo titi tui awm ve a, ka tibuai che u em” tiin inla polite fahrhan mai hian min rawn zawt ve ngei a, a tawngkam ka hriatah chuan a polite ve ber tum a ni hial ang. “Tibuai lo e, hei kan lo titi mai mai a. Marem, ka cousin-te khan min lo ngaihtuah lutuk ang, haw an duh tawh pawh ka ring ka phei phawt mai ang. E chuan ka lawm lutuk aw, ka zang huaiin ka hria, min lo tawngtai pui ve rawh aw” tiin Maria-i chuan mi lo tawng khalh a. “Ni e, a pawi chuang hleinem. Mahse Lawmthu sawina tur engmah a awm hleinem, nidangah pawh kan la inkawm zel ang chu. Hei pui hi Ramdina nih hi, ka thian kawm ve ber. A hmel en aiin a fing ve a nia” tih pah chuan kan nui ho deuh dar dar a. A cousin-te awmna thleng ka va thlah hnu chuan Ramdina pek chuan “Engtin nge i lo tih hman a, a tap pur leh nghalin ka hria, i va che na awm ve” tiin nui thu pah chuan min zawt a. Ngaih kawih tur engmah a awm loh thua ka chhan hnu chuan “A number i nei hman em, naktuk zanah leng i la” a rawn ti leh a. “I ngaih ang kha engmah a ni lo, haw ang a tlai tawh, haw kawngah ka hrilh ang che” tih leh motor lam pan chuan ka phei nghal a. Rilru-a Maria-i tawrhnate ngaihtuah neuh neuh pahin in lam pan chuan kan tlan chhuak ta a ni.

]]>
<![CDATA[Ka Thianpa kha...]]>Wed, 28 Nov 2012 11:10:57 GMThttp://fellington.weebly.com/home/ka-thianpa-kha
Kan naupan lai (ti ve ngial ila) kha chuan, kan veng naupangah hian keini pahnih aia inhua hi kan awm kher ka ring lo. Kan indo nasa a, kan insual nasa bawk a, hnar pawh kan inhnek thi sak ngun hle. Tih el nan Christmas Card mi rawn thawn a, a phek chhung lamah “Tun zanah indo ang u” rawn ti ngattu kha a ni. A te si, a kawlh si, a nghal bawk si, ka huat theih dan kha. Kan pawl lamah kha chuan min zuam ve deuh ber ni ngei tur a ni, inpheksual kan tum apianga, hma zawn ami te theuh sualpui tur kan tiha ka hmaa rawn ding ve chat thin kha a ni a, ka hlauh loh tluk zetin a ni paw’n mi hlau chhe te eih bik lo.

Engtin nge kan inkawm chhoh dan hi ka hre ta mai tlat lo. Chutiangin ani paw’n a hre bik hek lo. Khati khawpa naupan laia indo nasa leh insual nasa, in haw em em mai kha thian tha ber kan ni chho thei tlat nia. A hnua kan sawi leh paw’n “a mak ve ngawt mai” tih bak sawi tur kan hre ngai lo.

Tum khat chu Amah leh thian dang dangte nen hian kan leng ve a, kan lenna pawh kan Sikul kalpui thin, U Tpi (RIP) te inah ngei mai a ni. Inla tlangval ve tawh takin choka lamah chaw ei dawhkan kilin thingpui no kan lo dawm ve far reuh a. Hetih hun lai hi 2003 kum ni tain ka hria, tet pawh kan la te ve hle a, hostel atanga kan chhuah lai a ni nghe nghe. Chutia kan lo thu far chu an thenawm pitar hi a rawn lut nawlh a, keini dawhkan lo kil ve ran chu min han en dauh dauh a, “in inlengte chu puak tham rual lek lek an la nih hi mawle” a rawn ti mai chu(h), mahni lo maha intih tlangval ve tawh nen nuih a za duh lo teh a sin aw.

Khatih hunlai vel bawk kha a ni zana Bicycle-a len chhuah kan hrat lai kha. Night Bus lo thlen hun lai vel awmah hian “kan bus a rawn thleng tep tawh ang” tiin Electric Veng lamah kan tlan thla ziah a nih kha. Gate Tlang chhuk thla kan tlan ngam loh avangin Kanaan Veng lamah kan kual ziah bawk a, kan peih thin zia kha aw. Vawikhat chu Kanaan Biakin bula kual zau laiah hian kan tlan chak lutuk kan kual zo ve ta pek lova, side drain an laihna leivung chhun pawnah kan tlu khu luih tawh bawk.

Pawl sawmpakhat exam zo chawlh hmanga kan haw hi kan motor Maruti 800, kawta kan hun deuh ngawt tawh ngei mai kha “chhiatna em em a la awm lo bawk a, petrol te thun ila ala nun theih ka ring tlat” tiin thianpa chu ka sawm a. Ani a phur zawng tak mai chu lo niin, chutia kan han en vel chu Brake Oil te kan han check a, awm reng reng a lo awm si lo, Brake Oil kan thun a, kan bleed a, a bleed-na lo tuiek nasa tawh lutuk kha kan herh nghet leh thei tawh si lo, tihngaihna hre tawh hek lo le perek kan kheng bur ta tawp mai a nih kha. Engtin tin emaw chuan kan tinung ve thei mai a, wiring erawh khawih thiam hek lo Headlight chhi thei lovin, emergency light pawt eng chungin zanah te khan kan la tlanpui ve tak ang lawp lawp a. Perek khen bur kha dawk hlauh se chuan chuti hlauh a ni mai, mahse a hunlaiin chuti lam kan ngaihtuah lem lo, kan tinung thei a, kan tlanpui thei kha kan intihtheihpui ve tawk em. Fur lai anih avangin a chung phui tha lo erawh chu kan ngaimawh ve viau a, thawm that dan erawh kan hre chuang lo. Thianpa Mawia’n “Motor tui hul lova chuan chu, ruah a sur duh bawk si, motor-a chuang ve e ti lovin kan huh vek dawn a lawm le” a tih thin te kha, ava ngaihawm thin tak em.

Kolkata-a pawl 12 Science ka hlawhchham pui hnua ka haw hian, school tan leh hma siin Hnahthial atangin Leite-ah nula rim turin A bike Pulsar 150 ngei maiin kan thian pathumin kan inphur phei a. Tun thlenga ka ngaihtuah let hian ka la zak chem chem thei nia. Khatia kan thleng phei kha Current an lo khaw pum neih loh a, a thimin a reh tha duk duk khawp mai. Kan rim tur kha an In kan hre chiang bawk si lo a, zawh mai tur khawlaia teivak hmuh tur an vang em em mai leh nghal a. Nakin deuhah chuan nula pakhat hi kan lam pan hian amahin a rawn chhuk lauh lauh a, thianpa chuan “lo zawt ang u” tiin bike atang chuan kan chhuk a. Chu nula, kan zawh berkher chu kan rim tum U chu lo niin, an in chu a lo hrechiang kher mai. “Min lo zui r’u” tiin zak rilru angreng tak chung chuan kan zui lut ta a. Kan rim tum zawk chu a lo mu tawh leh nghal, an va kai tho chawp leh te te a nih kha, ava hahthlak tak em. Chutia mikhual hmelin an fanu rim ta chu Pa ber chuan khawilam mi nge kan nih tih te chu  min zawt ta a. Chhan pawh ka chhan hmain Thiana pek chuan “Lunglei atanga rawn chho kan nia” a rawn ti ta mai, kan rim ve ber te nen hian kan inhre sa ve tho a, a ni pawh chu ka va melh a a lo nui deuh rulh nghe nghe a. Engvanga Lunglei khua anga rawn insawi ringawt nge maw a nih chule ka ti rilru rauh rauh a, chutah apa chuan min han enchiang deuh a, Thianpa Tluanga chu a thlek vang vang a, “Nang chu Malsawmpuia fapa i va ang ve” a rawn ti ta mai, apa hming nen lam khan a rawn hre ta si, engkim a pherh zo ta. Ka pa hming chu min han zawt ve leh a, ka sawi a a lo hre leh em em zel bawk si. Chutah rang fahranin Thiana bawk chuan “Nia, anni pahnih hi chu Hnahthiala ka thiante an nia, keimah ber hi Lunglei ami chu ka nia” a la rawn ti ta deuh deuh. Ka lo ip chawih chawih a, apa hming a zawt ve ang tih mawlh kha ka lo hlau a, zawt vaih chu ni se an hre dawn lutuk bawk si, ava hahthlak duh teh reng e aw. Rei pawh leng lo chuan kan haw ta nal nal a, haw kawngah kan zak lutuk chu kan kuk phei ta rawng rawng mai a, Thianpa Tluanga chu kan mawhpuh a, “Nangmah vang vek” kan ti thul. A nuih zatthlak duh angreng a si aw. Thingpui erawh min lum tui hle.

Lui kal hi nuam kan tive thei em em a, kan kal ve fo bawk a. Kan pahnihin engmah tak tak tih thiam nei si lo hian U Ahma-a kan sawm a, keinin Gelatine te kan thawh ve a, kan pathum chuan kan inzui ve hnak hnak thin (hnak hnak ka tih kher chhan hi chu, U Ahma-a hi keini aiin a len bik tlat loh vang a ni). Tumkhat chu Tuichangah, thlawhhma kai (Nghavarh) leh Tawnga Puk chho velah khuan kan vawm a. U Ahma-a hi kan han tibuai thei mai mai khawp a, keini Bomb vawm chu sawi loh a en pawh kha kan lo ngam ve tawk a nia, chutah a’n vawm a, a tlu ang angte chhar turin amah U Ahma-a bawk a lut leh a, lungpui chung atangin kan lo kawk kual ve zat zat thin.

Chumi ni, thlawhhma kai kan vawm ni chuan a lawm ka Thiana hi a chetsual lehpek ni. Thlawhhma kaiah chuan Lei ram tawh, a tlang hruite chu la awm vek, en reng reng pawha a kailawn leh a chhuat rem te chu a mawih tawh a ni tih hriat tak mai hi a indawh kai zar mai a. A lei(Bridge) tak han zawh tur hian kawng ko atangin kailawn, thinga siam sei deuh mai hi a indawh chho zuah bawk a. A hnuai lam chu kawng atanga awih thla vut mai hi a ni. Chaw fakna tur changel kan pahniha kan sat let leh lam chu enge ka rilruah awm pawh ka hre lo ka zawh chak ta tlat pek a. Chutia lawn tuma ka pan lai chuan hnung lam atangin chak tawka mi rawn tlanpelin mi lawn khalh ta a nih kha. A kailawn a zawh chho zai zai a, “Pute i rin aiin ka pa ang, huai ve fu lo maw” tih pahin a lawn chho ta zel a. Lei (Bridge) a han pawh chho tep, lei (Ground) atanga a sang lai tak mai a thleng chho tihah chuan a kailawn chuan a rawn chim pui ta. A thing kha a lian tha angreng hlawm bawk si, a ri thla ta zawt zawt mai a. Ka mangang hlau bawk si chu arang arangin a tlakna lam panin ka tlan thla, ka au pah bawk, a tlakna lai ka zuk thlen chuan ka mangan lutuk a lo hlau ve bawk si nen thei leh thei lovin, hnang tih hriat reng reng khan “Pute pute ka tha e” ala rawn ti tak ang tawk tawk a, thaw aveng deuh huaia, kan inbuaipui zawh hnu chuan abul atangin za fahranin kan nuih tak tak mai a nih kha, a lawm vak lo chuan ka hria. A na ve thawkhat tur a ni, a kal bai suih suih a, a nak leh chawn te kha a thi ang sung bawk a. Tichung khan kal lama a thil ah leh silai ken a chuh tlatte kha kenve talh a la tum a, U Ahma-a nen kan chhuhsak lui a, a tlawmla ve laklawh bawk si, a duh lo viau chungin kan chhawk lui ta nge nge a nih kha. Khang hunte kha ngaihtuah mai chuan ala rei lo a sin, hmanni lawk la ni maite hian ka hria.

Kum avei a, hun a liam a, kan zirna hmunte a inan tak loh avangin mumal takin kan inkawm thei ta lova, mahse ka haw lai a nih phawt hi chuan ani pawh a rawn haw ve leh vat thin. Nikum June thla-ah Summer Exam zo chawlh hmangin ka haw a, Thiana pawh chu a hnu lawkah a rawn haw ve a, Thiltlang daiah a bike ke a chhiat avangin kan motor-in kan va hruai nghe nghe a. Tichuan kan inzui ve leh deuh chawt a, hming pangngai pawha inko lo hian kan thian ho hi ‘Zuala’ tih leh “Pute”  ti hian kan inko deuh vek a, apa hming hi Pa Zualtea a lo ni ve kher bawk nen vawikhat chu an kawmthlang atang hian Mawia’n “Zuala” tia an ko vak mai chu, apa zawk a rawn eih ta nawlh mai, kan nui nasa teh a sin aw. Tichuan ka kal a hun leh ta tihah chuan Ka Pa’n Tlabung atanga Kelpa tuai min rawn hawn chu thian hovin inthlah nan kan talh a, hlim takin chaw te kan eikhawm a, zanah pawh rei fang chu kan leng, Camera a rawn keng a, thlate kan la kual ta zel a. Hemi zan hi amak khawp mai, amah ber khan kan haw hnuah pawh “La leng kual ang u, thla kan la la tlem lutuk, veng chhungah vak ila thla la ho leh ang u, inhmuhkhawm a khat leh tawh dawn em hi” tiin min kar ngang ngang a. Dar 11:30 a ri tawh bawk nen “A tlai tawh angreng sia, ka la insiam bawk si lo, zing thawhhma ngai bawk nen” tiin ka hnial a, kan haw darh ta a. Kan in atanga U Ahma-a leh Mawia nen an pathuma an chhuak chu ka thlir zui reng a, hreh takin keipawh a tukah chuan zirna lam panin ka liam ve leh ta a.

Lung a leng tha duh bawka kan inbe kual hlawm deuh reng a, chutia ka chhuk atanga thla li hnuah chuan tlai khat ka class bang chau deuh hi Thiante room-ah ka lo muzal deuh mai mai a, ka lo chhing sek hman ni tur a ni ka phone call dawn chuan min tiharh zawk a, ka’n en nak chuan Marema (Spiky Bawitlung) hi lo niin ka pick up nghal vat a, “Putea te an accident kha i hria em, Handyman chu a vak chhuaka, amah an la hmu lo, a thi nge dam pawh a hriat loh” a rawn ti ta mai. Dik tak chuan ngaih that lohna em em ka la nei miah lo, Thiana hi chu lirthei lawm ve tak mai a ni a, tawng mawi lo ni lo se, bike-a a accident tih thawm te hi chu kan hre ngun lutuk, a thi ang tih ngaihna reng reng ka hre lo. ‘Che sawn thei lovin khawilaiah emaw damin a awm awm tho em mai’ tih chu ka rilrua rawn lut a ni. Marema hnenah chuan “Ka chhungte ka’n zawt chiang ang e” tiin phone chu ka dah a, ngaihthat lohna em em pawh nei lovin ka nu ka be ta nghal a. Ka nu ka han biak chuan an in lamah a lo thleng phei tawh a, Marema min hrilh chin bak min hrilh tur a hre bik chuang lo.

Tichuan chutia sawi tur em em hre lova kan kan ngawih deuh reng hnu chuan a chetsualna hmun Lungchhuan lam atangin phone call an dawng a, ka nu chuan “Ngawi lawk rawh aw hei chanchin an rawn sawi dawn, lo chelh rawh” a ti a, chutah au rual deuh thawt hi ka hria a, damin an hmu an lawm au thawt turah ka lo ngai, mahse a lo ni awzawng si lo, “Tebawih, Ruata chu a thi a nih chu, puitling takin awm tum hram hram rawh”, engmah sawi zawm tur kan hre tawh lo, ka bing mup mup a, an tap thawm leh ka nu inhnit ri hruih hruih thawm bak engmah hriat reng ka nei lo. Ka mit atangin dan rual lohin mittui a rawn far nghal zung zunga, ka nu nen engtin nge kan inbiak pawh chu ka hre mumal tawh lo, ka hmet tawpa, ka room lamah ka tlanphei nghal a, khumah ka thu hnawk a, ‘ka thianpa Ruata, F.Vanlalremruata ngei mai chu a thi maw, a ni thei lo engvangin nge a thih ang, thi thei a la ni lo, hmanzan lawkah pawh a camp chhuak hlimin mi rawn call a, a hlimzia leh awm ve ila nuam ka tih tur zia te pawh mi rawn hrilh a nih kha, a ni thei lo’, awih har ka ti ngang mai, mahse thudik a ni tlat bawk si.

Ka kal leh dawn zana kan inthlahnate ka ngaihtuah chhuak uaih uaih a, “La leng kual ang u, thla kan la la tlem lutuk, veng chhungah vak ila thla la ho leh ang u, inhmuhkhawm a khat leh tawh dawn em hi” tia min sawm ngawn ngawn laite khan enge ka lo aw leh mai loh. “Kan inhmuh hnuhnunber tur a ni tih chu hria ila, Thianpa, i bulah khan zan khuain ka awm ang a, kan leng kual leh ngei bawk ang, mahse kan hma hun hi kan lo hre lo em a ni. Min ngaidam mawlh teh” tiin ka rilru chu ka be mawlh mawlh a. Ka pain min hnem tuma min rawn phone te chu hriat a lawi pawh ka nei lo. Zan ka mu thei lova, a tuk class pawh ka kal thei hek lo. Vuina hun an hman laite chuan thiante nen kan inbe kual a, hriat loh hlanin mittui a lo tla leh thin. Aw kha hun kha kava ngai lo tak em. Mahse thihna hi mihringte ta, tuma bawhpelh theih a ni tak si lo a.

Date 21.11.2012 khan a kum khatna champha a lo thleng ve ta reng mai. Lung a leng a, he khualzinna khawvel, rei lote a rawn cham ve zawk chhunga hun hlimawm leh nuihzatthlak tam tak kan lo hman ho thinte min chhuikir tir lo thei lo. Ziah tur atama, rilrua awm zawng zawng erawh ziak chhuak dawn ila kan ziak seng tak tak dawn si lo. Tihian kan titawp tawh mai ang e....

“Thianpa, hriatthiam a har kan la ti fo a, kan hrethiam thei tak tak dawn chuang lo a nih hi. Kumkhat a lo vei ve ta reng mai, awih a har a, awih loh theih lohin kan bula i awm ve tawh lo hian a nemnghet tlat bawk si. I thlalak en hi kan inhnemna a ni fo ringawt dawn a nih hi, rilru erawh ana lo thei si lo.

 

I INPEIH VELEH NANG CHU HMANHMAWH TAKIN I KAL A, KEINI KAN LA INRING VE SI LO.

 
I chenpui Angel-te hnenah chuan hun hlimawm tak kan hman ho thin kha, thawnthu ngaihnawm tak angin i lo hrilh thin dawn nia. Thianpa, kan ngai lutuk che.”

 

 

In a blink of an eye,

I never got to say GOODBYE.

Like a shooting star,

Flying across the room,

So fast so far.

You’re gone too soon,

You’re gone too soon...

 

______________________________________________________
]]>
<![CDATA[┬áKa lehkhathawn]]>Mon, 01 Oct 2012 19:07:31 GMThttp://fellington.weebly.com/home/ka-lehkhathawn“Hello”  

“Maria-i ni em aw”

“Aw ni e, tunge aw, ka va’n hre thei mai lo che” 

“Hehe...nia min hre lo mai thei, ka be chak lutuk che a, ka rawn be ve tawp che a nih hi”

“Uiii..uang uang lo mai teh, i aw chu ka hre tep chein ka hria, insawi la chu ka hre thei hrim hrim ang che”

 “Tete-a ka nia, ka sawi tawh kha ka be chak lutuk che a, ka lo be ve tawp che nih hi”

“Tu Tete-a nge a, Tete-a tih ringawt chuan ka va’n hre thei mai lo che ve”

“Kha min hre lo ang ka tih reng kha, In Biak in thlang velah Tete-a tih hriat i nei em”

“Uiii Laltete, insawi tlang ve mai tur che lawm, insawi la chu ka hria ang che ka tih reng kha. I van fel em em, min rawn call ve duh tak tak a, nula i rim na nge”

“Ahh..rim tur ka hre ve hleinem, mahse naktuk zan lamah chuan ka hre ve tawh mai thei”

Kan inbiak hmasak ber dan hi i la hria em Mar..Mobile Phone i la neih loh avangin I pa phone-ah ka rawn call che a nih kha. Mipa zawk mah ni ila ka aw atang khan ka lai viau a ni tih chu i hrethiam ang tiraw, mahse biak che kha ka chak tlat si a. Mar, i lakah hian beisei nei ngam tur ka ni tawh lo tih chu ka hria, chu chu he lehkhaa ka ziah tum a ni lo tih min lo hriat sak hmasa la. Kan intawn dan, a tawp dan leh  leh ka rilru te hi i hnena ziaka rawn thlen ka chak thin a, “ka lei taksa ka thlah hma ngeiin ka ti hlawhtling ang” tiin ka lo intiam ve thin a sin. Bul tan dan tur ka hre lo a, a tawpna lai tur lah ka hre bawk hek lo. Ka rilru, ngaihtuahna zawng zawng sengkhawma ka rawn ziah chhuah hi min lo chhiar sak hram la, chu chu i laka ka beisei leh ka thil phut hnuhnung ber a ni ang tih ka tiam a che.

 
Kan ina i rawn kal hmasak ber ni kha i la hria em, i U nen in rawn kal kha. Ka la hre reng, i U  leh ka U an inkawm thin avangin i U zuiin i rawn leng ve a, thutthlengseiah TV enin ka lo mu zal mai mai a nih kha. In haw hnu khan ka U hnenah “I thiannu ai chuan a nau kha a chhe lo daih zawk a nih kha” ka ti nghe nghe a sin. Mahse enge ka tih chuang ang a, engtin nge ka tih chuang  ang. Thingtlang tlangval, zirna avanga in venga mi inluah a khawsa ve mai kan ni si. Kawr mawi tak, a man a to ka tih deuh avanga ka lei ngam chiah si loh, mawi ti em em leh awt em em a ka thlir dauh dauh thin anga thlir mai bak che kha ka tan chuan tih theih a awm si lo.


Kan School luhna a in ang lo va, nang lah chu Hostel-ah i awm leh daih bawk si. Hmuh che kha ka chak thin a, hmuh theih turin i awm si lo, chutihrualin nangmah hmu turin i engmah ka ni lo tih ka hre chiang si a ni. I la hria em, vawikhat i Hostel lut tur i Pa-in a thlah che a, Venglai chhukthlaa in rawn tlan thlak kha. Motor seat hnungah i thu a, kei ka thianpa nen kan rawn chhoh lai tak a ni ve bawk nen. Min rawn hmu a, nui sangin min rawn Bye bye lauh lauh a nih kha. Ka thianpa bulah intithei taka “Maria-i'n min rawn bye bye, i lo hmu em, i hmu em” ka tih chul lai khan min rawn hmu vein, ka hlimna kha atakin rawn hre phak ni la chuan min khawngaih vang chauh tal paw’n vawi tam tak min bye bye nawn duh ngei ang. Hostel-a awm ta na na na chu rei tak ka hmu lo che a, a ruka ka lo lungleng ve em em ringawt te kha a mak ka ti thin. Ka ngaihtuah let leh hian “Engvanga lo lungleng ve ringawt nge ka nih le, min ngai ve nise chu thuhran” tiin mahni leh mahni hi ka la in nuih kur kur fo thin a sin.
 

Ka thianpa bulah ka sawi chamchi che a, chutah  a ni ta pek chuan “I dawih em mai, bem ngam tak tak hlei lo, sawi pawh sawi sawi ve tawh suh” tiin min chhang thin. Ni e, ka duh che tih kha a bulah chuan ka zep lo, ka sawi ngun mah mah tih lam a ni, mahse i hriat tura sawi erawh ka ngam tlat si lo kha a ni ka buaina chu. Ka insehruh ve fo a, “Hostel atangin rawn chhuak se, ka hrilh tawh hrim hrim ang” tiin zan mut dawnah keimah leh keimah kha ka intiam fo thin a sin.

 
Hun a ral a, hun a kal zel a, Final exam zawhah hostel atangin i rawn chhuak ta cheng a, mahse, midang hriatpui loh vin, keimah leh keimah ka lo intiam ve tawh nate chu a tak ka thlenpui  ngam lo leh ta a nih kha. Dawih chu min ti rilru ve tho ang tiraw.
 

Mar...Tlai khat ka school  bang chu maw, ka tih fo thin angin kan kawmchhak Bakery-ah chhang ka lei haw a, ka u class kal a la rawn haw loh avangin ka thingpui lum leh chhang lei chu keimahin ka lo ei mial mial a. Kan thutthlengseiah chuan thu thluang duaiin TV ka en pah bawk a. Chutia nuam taka ka lo awm dawr dawr lai chuan ka U chu hmanhmawh takin a rawn haw a, a hmelah chuan a hlim tih a hriat a ni. Kawngkhar a rawn hawng chu a rawn nui lut vur vur a, ka bulah chuan a rawn thu nghal vat a. “I va mawl hmel vur vur e, enge i rawn nuih luh thru a” tiin thil awmdan ka lo zawt a. A ni ta lah pek chuan min hrilh tha duh lo in “Thingpui min lum phawt la ka hrilh ang che” tiin min chhang a. “Dawhkana nopuiah khan siam sa ka dah, a la dai hman lo ang,  inthlit ve mai rawh” ka tih pawh chuan “Min va thlit la, chhang min rawn lak bawk la, ka hrilh ang che” a la ti hram a. Ka hriat chak tawh em avangin Thingpui chu  khat leng lawngin ka thli a, chhang nen chuan ka pe ta nge nge a.


“Min hrilh tawh rawh le” tih pah chuan ka u chu ka thut hnaih ang sauh sauh a.

 “Maria-i’n min lo call rawh se a ti, zanah apa phone a kawl dawn a” 

“I va mawl e aw, i thingpui  inthlit peih loh vanga intih der kher, sawi tha ve mai ta che”

“Dawt a nih chuan ka ring ka ei ang, a ti tak tak a lawm, vawiinah Nute-i’n min hrilh a lawm le. Lo call ngei ngei rawh se a ti leh nghal”

 
Ni e Mar...Kha thu ka u in min hrilh lai khan ka awih miah lo, engvang teh lulin nge ka awih ang. Mahse ka u hian min tihder ka hre ngai lo va, dawt min hrilh pawh ka la hre ngai  hek lo. Chutah i pa phone number chu rawn sawiin ka phone ah chuan ka save ta nghal a. Mahse ‘tichung pawh khan ka la awih ngam lo, ka awih thei lo a ni ber mai. Phur takin, huphurh ru angreng tak siin zanah ka rawn be ta nghal che a nih kha. I aw ka hria a, phone-a kan inbia ringawt te kha ka hlimna tawk a tling em em a, ka thianpa hrilh thuai thuai ka nghah hleh zia te kha.

 
School in chawl tawh bawk a, khami hnu phei kha chuan zantin kan inbia a nih kha. Chutia inbe ta na na na chu kan rilru in hrilh ngam hunte kan lo nei a, kar lovah inngaizawng kan lo ni ve ta reng mai. Kha tih hunlai khan maw Mar, khawvel mihringah hian keia hlim hi an awm ka ring bik lo a sin. Hlimna zawng zawng kha keima ta bik emaw tih hial turin ka tan par a chhuah mawi em em a, tu nun mah kha ka awt bik lo.

 
I la hria em, Sunday vawikhat inkhawm turin ka lo nghak che a, gallery-a kan thut dun kha. Thusawi tu khan eng thu nge a sawi tih reng ka hre lo, ka ngaihtuah hek lo, mahse ka hlim tawk em em a ni. Ka phone a ka thlalak, ka thau ve deuh lai ka hmuh che a, nui paha “Zu ei puam i ang lutuk” min tih te kha ka la hre reng a sin. Inkhawm kan bang a, Junior TKP fellowship kal i duh avanga chhun pachanga mitthi buhfai ka khawnpui che kha i la hria em, kan inzui hnak hnak kha. Buhfai ka khai a, thlan tla phunga kan inzui kha. Mahse, tuma hrilhfiah theih loh khawpa hlimna kha keimahah a awm a ni. In fellowship tur biak in kawt thleng ka thlah che a, ban velah kan inah i thiannu nen in rawn chhuk a, i thiannu kan va thlah te kha i la hre ve ang ti raw. Mar, i thiannu kan thlah, Synod Bookroom kawt pheia kan kal laia tleirawl 15 bawr vel thukhawmin vawm puaha min lo vawm te kha i la hria ang tiraw. Khami tuma ka thinrim zia leh tlawm thlak ka tih zia kha. Ka hawi leta, va pan phei ka tuma, ka banah min rawn chelh a, “A ho lutuk, an mawl hlawm em mai, kal ang u” i tih laite kha. Tun hnua ka ngaihtuah let hian i thlavang hauh vang tal pawha engpawh huama khang tleirawl rual  ho ka lo va hmachhawn lo kha ka inchhir a, ka rilru hi a inthiam thei lo a sin.
 

Board exam kan zo va, loh theih lohva ka haw a tul ta si, ka huphurh ber mai chu khang hun laia ka hman thin Reliance kha kan khaw lamah chuan a hman theih ve tlat loh a, duh angin kan inbe tam thei lo ang tih kha ka hlau a ni. A dik a ni, nang be lo che a nikhat awm pawh kha a nihna takah chuan ka zuam thlawt lo a ni. Ka haw chhoh hma tlaia kan kawt Lamkhuang buk hnuaia kan titi malh malh lai te kha i la hria em, thu tam tak chu kan sawi lo a ni tiraw, sawi tur hria pawh ni ta teh reng ila sawi chhuah chakna ka nei miah lo tih kha ka hre chiang. Mar, awm rei lo tur leh rawn chhuk thla leh vat tura min chah laite kha i la hre ve ang tiraw, result chhuah hmaa rawn chhuk leh a harsat tur ziate chu hre ve reng mah ila, tih lawm loh che ka hreh em vangin ka rawn chhuk leh vat tur thuin ka chhang che a nih kha. Tichuan a tukah chuan hreh tak chungin ka haw ta nge nge a nih kha. Khami tum ka haw kha maw Mar, thiante mak tih ka hlawh a, keimah leh keimah takngial pawh kha mak ka inti a sin. Ka awmdan kha sawifiah dan pawh ka thiam lo, ka ruak huai ni ber hian ka hria a, chutih rualin keimahah kamtu enge maw tak kha a awm leh lawi bawk si. Zanriah eikham veleh thiante leng tur pawh thurual thei lo vin, Reliance signal man vena lai chuhin, zantin Bungpui hnuai lamah ka in khalh chhuak ziah a, thiante hmai zah a na duh ngei mai. Mahse nang vang a nih chuan thiante zinga awm tam hman loh pawh kha pawi ka ti reng reng lo, mahse ka thlauhthla vek e tihna chu a ni bik chuang si lo.

 
Khang hun lai khan min ngaihzia thu kha i sawi chamchi a, chutiangin keipawh ka bang bik lo. Kan inbiak tam poh leh ka ngaihna che kha a ni telin a zual zel thin zawk a ni. Khati khawpa induh leh inthlahlel, inngai ngawih ngawih si kha vawi leh khatah kan inkar thu zawng zawng a tawp ta vek a nih kha. Mar, a mak hi ka ti a, a mak hi ka la ti nawn fo a, awih harsa hi ka la ti fo a sin. Ni e, mi luhlul tak ka nihna hi a ni kan inkar thu vawchhe tu chu. Tumah dang ka mawhpuh lo, keimah vang liau liau hi a ni.


Ni e, kha zan, Bungpui hnuai ngei atanga ngai taka ka rawn biak che a,  I nu leh i U in keimah then tura an nawr nasat zia che i sawi zan khan, keimaha awm luhlulna leh inthlahrunna chuan nangmah be leh ngai lo tur chein a tiam a, “mahse chutiang engmah a thleng lo ang, a thlen ka phal bawk lo” i tih lawm lawm lai khan lo ngaithla che i la, ka luhlulna kha lo thunun thei chu ni ila hetiang hi kan thleng bik lo ang tiraw. Ni e, a hunlai kha chuan ka thinrim em em a, ka rilru kha a chawmawlh zo a ni ta ber mai. “A Nu leh a U hian heti khawp hian min lo duh lo a ni maw” tiin ka rilru chu a rum vawng vawng a, na ka ti ni. Ka ngaihtuah let ngial pawh hian min duh lo turin an eng pawi nge ka sawi a, khawi laiah hian nge an mit ka tlun lohna lai tiin ka rilruah zawhna tam tak a rawn lut a, chu chuan a ni he MIHRING chhunga awm LUHLULNA rawn cho chhuak ta chu. Ka in ngaihtuah harh a, Dawra kawr mawi tak, ka awh em em mai kha ka neihin a tlin lo chunga lei ka lo tum luih talh vang a ni.  Nangmah be turin Bungpui hnuaiah ka kal leh ta ngai lo va, i mangan tur zia ka hria, ka rilrua thi nghal hmak turah che chuan min ngai bik lo la, chutiang ni se chuan he Lehkhathawn pawh hi ka ziah a ngai lo ngei ang.



A tawp nan chuan maw Mar, “Ka hmangaih che” chu ka ti ngam lo, mahse he thinlungah hian ‘enge maw’ chu a awm a ni, chu erawh sawifiah thiam phak rual loh a thuk a ni thung si. He thinlunga chu THIL awm a chu, dama ka thawk ve tek tek chhung chuan he thinlungah hian riahna hmun a chang reng tawh dawn a ni.

Maria...Dam takin Mangtha le.....

 

  :suangtuahna nen:

]]>
<![CDATA[Nula ka rim ve a.]]>Tue, 01 May 2012 14:33:54 GMThttp://fellington.weebly.com/home/nula-ka-rim-ve-aKa phone chu ka kheuh neuh neuh a, 'i nute h an mu hr twh e, an ninwm' tih chu ka bula thu chu ka thawn zeuh a, a msg tone a rik veleh chuan a en nghal a, a nui ver ver a, ka nakah chuan min rawn nghawk sawk a, ka phu deuh zukah chuan a pa phei chu rawn leh hawi pahin min rawn melh zuk hman nia. Engtin mah kan awm tawp si lo a. A pa a hawi let leh chiah tihah chuan 'An v inla Spider Man tk' tih chu ka thawn leh a, "gwi reg khn thu v my2 rh, an mu trp ag" tih chuan mi rawn reply leh a. Kan in melh a, kan nui dun deuh thru a, apa bawk chu rawn hawi let lehin "Bawihi thingpui hang han lum teh, i nu nen kan lo in ang" a rawn ti deuh hmuk a, "ni e han lum tawh" tiin a nu pawh chuan a rawn chhunzawm ve nghal a. Umm 'i inleng pa pawh khan a duh ve lawmni' a rawn tih ka rin tehreng nen min sawi tel ve miah lo leh nghal, ka sa deuh phat hman a, mahse A pa Bawihi mai ni lo, keima Bawihi ngei chuan "Te, i duh ve em" tiin dam diaiin mi rawn zawt a. " Duh lo mai, mi tihkep duh suh" tiin ka chhang a. Dik tak chuan Mizo induhsakna leh a hminga tawngkam mawiah pawh 'Tetea kha thingpui han lum sak leh ta che, i nu nen pawh kan lo duh ve ang" te an rawn tih ka lo inbeisei ve nen, ka lo inbeisei sang deuh pawh a ni mahna. 'In thiltih dan mai mai chu(h), in fanu hi ka ruk sak daih mai tur che u a sin, zingah in zawng buai chuk mai tur a nia' ti rilru noh noh pahin thingpui chu ka hnar lui ve ta ngat a nih kha. 
Kan TV en lah chu a'n hmuhnawm loh em em mai leh nghal a, pa ber chu thu ber tih hriat fahran hian remote control lek larh pah chuan thingpui hang chu a dawt ri khawlh khawlh a, a hmet kual sek leh nghal a, "Ka pu chu kawlphe hi hmuhnawm i ti viau ang a" tih mai kha ka chak rum rum hman . A tawp a tawpah chuan Demand channel a Ruotmawi zai chu kan en thap a, ka lairil a fan lo chiang kher mai. A pa chu a ham bui bui a, a mit meng pawng hlut chu a khap ang fuk fuk a, chutah sana en pahin "Nu-i mu dawn i la, mut a chhuak tran tlat", a nu rawn chhan hma hma a "Nia" lo tih khalh kha ka va chak teh reng. Chutah Keima Bawihi nu chuan "Sangtea a lo la haw lo, mut san hi ka ngaih a ngam thin lo a, han nghak leh lawk ila"...Umm, ka thinin a tuar ta lo 'I va han phakar tak, i chhuanlam mai mai a nih kha, Sangtea rawn haw ai chuan ka haw i nghak zawk a nih kha" tiin ka rilru chuan ka vin leh ta tuar tuar a. 

Dar 10:30 a rik meuh chuan kawngka chu a rawn ri deuh dawt a, Sangtea chu a rawn inchhuih lut deuh khut khut a, ka lo nuih deuh thaw leh nghal a. Chutah a nu melh pah chuan 'i chawh lutuk, chhuanlam tur pawh i nei tawh lo, mu vat vat teh u' ka rilru bawk chuan ka tih khum bawrh bawrh a. Mihringte hi kan rilru leh ngaihtuahnate hi inhriat sak vek thei ni ila chu, kha zan thianghlim lo, zanthiang reh pawh ni si loah khan kei ngaihtuahna sual pu kha ka va riang dawn lua em. Makpa tur chuan ka tling lo chiang ta ve ngawt ang. "Ti rawh Pa-a, i mu dawn ila, Naktuk zingah YMA committee in neih kha, i theihnghilh ange aw..Mama nangpawh mu nghal rawh, a tlai tawh hei"mei nei taka rawn ti pah chuan mu tur chuan an insiam a. Engahmah ka ngai duh lo lui ve ngat a, an room kawngka bul atang chuan a nu bawk chuan "Bawihi nangni pawh rawn mengrei lutuk lo ula , zing thawh in harsat thei si" a la rawn ti hram a, chhungrilah erawh ka khi tut tut tawh bawk si. 


Huiham, an mu fel ta maw tihah chuan hei ngei hi a nih dawn hi zanthiang reh chu ti rilru pahin Ka Bawihi chu ka va fawp ta nghal vawng vawng mai a, ka nghak rei fan fan bawk a, nghah man ava awm tak em. Amaherawhchu kan thutna thutthleng kha 'Silent Mode'-ah a lo awm lo niin, khatia thutna kan insiam rem velah khan a lo chik ring deuh nge ni, khumpui lam atang chuan khuh khalh khalh ri chu a rawn chhuak nghal vat a, kan insiamtha rang hle mai. Tichuan kan titi a, kan inkawm a, kan nui a, kan infawp leh zauh thin a, a khat tawkin khuh ri pawh kan hre deuh reng a, ramri kham erawh kan pel em lo e. 11:47 a rik chuan khumpui lam atang bawk chuan apa chu chiang zet hian a rawn khuh leh ta khauh khauh mai a, 'umm, hei zet chu leng hnawt chhuak khuh ri a nih tawh ngei hi' tiin hlawhtling ka inti rilru tawh bawk nen, "ka'n haw ve tawh dawn ang e" tih leh thawh chu ka rual a. An verandah thlenga min rawn thlahin, ka bike chu ka hmet nung a, in mangtha mawlh mawlh chungin ka hawsan ta a 


 Keini pahnih inrim ve zawng, heti reng mai hi kan ni. A hahthlak thin a nia, Tunlai tlangval inla changkang ve et awt tak rilru atang chuan dawhtheih a ngai a, awmdan thiam a ngai em em thin a ni. A nu leh pate hi han ning ve viau thin mah ila, a nihna tak zawkah chuan tunlai Zoram Khawvel thalai te dinhmun an hre chiang a, mahni inchhung lumah ngei pawh kan fate thlahfal hi a him tawh lo a ni tih hi an hre chiang a, ka fak angreng zawk thin khawp mai. Kawng tam takah thil zirtir min nei thui hle te hian ka hre thin. 


Chutia ka ngaihtuah let rauh rauh lai chuan ka rilruah tunhma lama ka lo la ngaihtuah ngai reng reng loh te chu rawn lut zelin, Thalaite hi kan chep ti a iak iak tur kan ni em tihte chu kei rilru thawl, chhungte chawmhlawm a inla sang ve em em mai hi mi ngaihtuah tir ta daih mai a. A eng hi nge kan chepna ni aw tia ka'n ngaihtuab ve sateh paw'n kan chepna awm reng reng ka hmu zo ve tlat lo. Kan zalen lutuk awmngaihna hre lo a nih hi Drugs ngawl kan invei siak a, Zu ngawl kan invei siak a, Taimak aiah thatchhiat kan intihhmuh a, Nulat Tlangvalna kawngah kan tlan suau suau a, Khawthlang mite nun eng eng emaw lai lain kan lo inla Gangster ve em em a, a then lah Khawchhak lam unau te fashion leh style a buai reng reng in, kan tlangval tam takte pawh hnunglam atang chuan Hmeichhia nge Mipa an nih tih hriat hran har khawpin an nih deuh zuih tak hi. Takna nun nen dinthar kan ngai a, khua hi engtikah tak var ang maw tia mahni inringhlel rum rum khawpa ka ngaihtuah lai chuan Ka phone a ka Event Reminder set chuan Ka Bawihi uite dam lo entir turin Vety-ah kalpui angai tih mi rawn hrilh ta ral ral a. Ka inha sawk sawk a, ka ngaihtuahna thaichhe thak khawp chuan chawmhlawm bike nen chuan ka inkhalh chhuak ve leh ta vut vut a....

:sunagtuahna mai mai: 

]]>
<![CDATA["Se lo ve"]]>Tue, 01 May 2012 14:18:08 GMThttp://fellington.weebly.com/home/se-lo-veHmanni chu hmeichhe pakhat ka add thar hian inbox lamah 'Se love' tih hi a rawn thawn zui nghal zat a(ehemz). Ka buai angreng khawp mai a, 'engtia reply tur nge niang aw' ti chuan ka inngaihtuah buai nasa mai a. Ka buai chhan hi ka zei loh vang pawh a ni lo a nia, 'Se love' a rawn tih khan, ka va add zawk a ni si kha 'hre love' tihna niin 'ka va hre lo che ve' a tihna a ni thei ang em..??, chuti ni lova 'chhe love' tihna rawn ni ta se, ka hmel lah hian rinhlelhna nasa tak min pe bawk si. Reply loh tawp kha chu 'MAN lo e' min ti ang tih ka hlau bawk si, a sawi awmzia tak han zawt dawt ila, 'changkang lo reuh e' min ti ang tih ka hlau bawk si, reply ila ka reply sual ang tih ka hlau bawk si. Si si si tihtur kha ava tamtak em. Kha thumal(puitling lo) pahnih khan min va tibuai hrep tak..

Chutah reply dan tur kan ngaihtuah vang vang a, short cut thei ang berin 'nagph se bk l e...ha3' ti ta ila, 'chhe love' tihna a nih chuan 'nangpawh chhe bik lo e' tihna a ni thei ang a, 'hre love' tihna a nih chuan 'nangpawh hre bik miah lo che' tih lam a kawk tel thei tho ang tiin reply ka tum ta a. Mahse ka tawngkam hman khi a dik thei ang em, ka buai rei lutuk, a dang chhan dan tur ka ngaihtuah chhuak zo tawh thlawt si lo. 'Chhe love' tih leh 'Hre love' tih han pawhzawmna tur thu kha avang lutuk. 'Umm, ka hmelhriat pawh a ni hleinem le, a ngaih ngaihin ngai teh se, thawn tawp ang, thihna tur pawh ni hlei lo' tiin ka kut zungpui chuan ka Mobile screen a 'Send' tih pawl va va chu ka zu chu ta kauh mai a.  


Phur si, phur chiah si lo chuan message lo thleng leh tur chu ka nghak ran mai a, ka refresh deuh chhen bawk a. Ka zam deuh vel nia mawle, 'aw, mihring laktlak loh lutuk tak ka va ni em' tia han khek tuar tuar tak kha ka nap a, thiante an awm ve vang mai chauhin a ni, he mihring hi a au chhuah loh ni. 

Rilru intih thawven pah nan, thu beng varthlak deuh deuh hi an post leh tawh ang a tiin Hnahthial chatter lama lut turin chung lam sir kila 'Home' tihah chuan ka chu leh ta kauh mai a. An la muang em em zui khawp a, a in load chhungin lu va suk lawk te kha ka duh hman rum rum nia. Home page-ah chuan ka lut ta hlawl mai a, beisei ang ngeiin ka notification chuan Pu Sawma Hniarcheng in Hnahthial Chatter lamah post thar a siam thu mi rawn hrilh hre nghal zat a.Luh tumin ka tin zuai hman nghe nghe a, mahse chunglam sir kil ka'n en nak chuan Message(1) tih a lo awm va va mai a. Rilrua 'Yesss' pawp pah chuan hawn nghal mai zawk chu ka tum ta a.

Ummm...amah a ni ngei e, ka ring sual miah lo. Ka za deuh zek zek thei nia mawle. Ka hawng ta nghal vat a, ka va awih lo tak. "Nagmah lwm se lo fe jok cu...hahaiii...kwge wm a,i pp hi thynpa mi..vn jy l m m.
.a hmltha sy...twrhpui tp ce..:( " tih lo inziak tlar thet chu ka zuk hmu ta thut mai. Halleluia han pek tuar tak kha a nia ka nap ni. Huiham....Ka thaw huai mai, ven khat chuan ka veng huai e, chumai bakah ka thianpa boral pawi a tih thu,min tawrhpui thu leh hmeltha a tih thu a rawn sawi tel te chuan vawihnih chauh mi la rawn message na mah nise, a ruk tak chuan ka nel nghal der tawh nia. Kan inkawm chho zui ta zel a, zirna hmunte inhrilh pah chuan kan titi chho ta bawrh bawrh mai a, a hnu leh lam zelchu sawi tawh lo mai ang(ehemz). 
Kha thumal(puitling lo) pahnih 'Se love' tih vanga ka buaina te kha mut hmunah ka ngaihtuah chho ta a. A changin ka nui leh ver ver thin. Ngaihtuahna a kal thui zel a, Thalai ram leh hnam, khawtlang hmangaih tu inti te'n, kan ram ka hmangaih kan tih avanga Hruatute theih pa tawpa kan sawisel chiam chiam lai hian, Hnam hmangaihtute hian lehlamah kan tawng kan pawngsual ve bawk a, kan duh duh danin kan herkawi ta mai a mawni le tihte ka ngaihtuah a. Ram leh hnam hmangaih kan inti a nih chuan kan tawng pawh kan humhalh tur a ni. Mizo tawng chhiar thiam loh hi intihtheihna a ngai tam tak ka mit ngei hian ka hmu tam ve ta a, ka beng ngei hian ka hre tam tawh khawp mai. Mahni tawng pawh chhiar thiam tha thum lo kha kei chhuan tur nei lo hian ka hmusit ve tlat. Sap tawngte, vai tawngte chu thiam em em tur, a tha lutuk, kan zirna leh hnathawhna hmunah pawh kan hmang tam zawk ngei a. Mahse mahni hnam tawng Mizo Tawng chu chu humhalh a, a dazatna laka humhim tur chu a hnam neitu Mizo te an ni. Chu Mizo chu tudang ni lovin Nang leh Kei hi kan ni..

(Ti ve leh duah ang..phuah chawp mai mai nih khi aw.. hehe ) 

]]>